Plantun de Prouvènço

Pèr coumpara dos planto d'encò nostre

Ludwigia grandiflora & Plumbago europaea

Ludwigia grandiflora

Onagraceae

Nom en français : Jussie à grandes fleurs.

Descripcioun :
La jussìo-di-gràndi-flour es uno planto que trachis dins lis aigo morto e li roubino. S'un cop arribo dins un relarg, trachis à noun plus e envahis tout, coume sa cousino la jussìo-fausso-bourtoulaigo-d'aigo, Ludwigia peploides. Se recounèis de segur à si gràndi flour jauno e subretout que se tèn bèn drecho au contro de sa cousino. Pèr èstre segur, fau aluca lis estipulo que soun en pouncho eici e pas redouno. Aquesto jussìo es esterlo (2n = 80) e sa subsp. ié dison hexapetala.

Usanço :
A bessai d'ùni prouprieta mau couneigudo, mai s'avès lou courage, la fau derraba tre que n'en vesès.

Port : Erbo
Taio : 0,2 à 2 m
Fueio : alterno
Tipe bioulougico : Idroufite
Cicle bioulougico : Planto renadivo

Gènre : Ludwigia
Famiho : Onagraceae

Ordre : Myrtales

Coulour de la flour : Jauno
Petalo : 5
Ø (o loungour) flour : 2,8 à 5 cm
Flourido : Printèms - Estiéu - Autouno

Sòu : Ca
Autour basso e auto : 0 à 600 m
Aparado : Noun
Remarco : Planto envahissènto
Jun à nouvèmbre

Liò : Aigo - Roubino
Estànci : Mesoumediterran à Coulinen
Couroulougi : Óurigino neoutroupicalo
Ref. sc. : Ludwigia grandiflora (Michx.) Greuter & Burdet, 1987

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.